Nou wat nou, Heyneke?

Nog ’n naweek, nog ’n Bokspan.

Kyk op die oog af lyk die groep spelers nie sleg nie en baie mense sal bly wees om die name van Jaco Taute en Elton Jantjies in die groep te sien, maar as ons kyk na die name wat nog steeds daar is, dan kan ’n mens maar net wonder wat die plan van onse Heyneke gaan wees vir die volgende twee toetse.

Nieteenstaande die kritiese na die Bok toets teen Nieu-Seeland, blyk dit Heyneke nog steeds gaan hou by sy nommer een keuse op losskakel, Morné Steyn, óf as sy begin speler, óf as ’n inpak speler (wat waaragtig nie sin maak nie).  Meyer het tog gesê dat ’n week se rus tussen rondtes 4 en 5 is al wat Morné sal nodig hê om sy self-vertroue te herwin.

Nou ek is geen spesialis in kop-kondisionering nie (wat blykbaar Morné se probleem is), maar as hy nie self-vertroue kon terug wen na 3 weke se rus voor die Engelse toetse nie dink ek nie een week sal hom help nie Heyneke.  Meer as dit, ’n speler wat sukkel met selfvertroue in sy spel gaan dit nie terug kry deur op sy gat te sit en daaroor te dink nie, hy gaan dit terug kry deur te speel op laer vlakke waar die druk minder is.  So kan iemand vir Heyneke op sy Walkie-talkie in die hande kry en vir hom net laat weet dat ons in die middel van ’n Currie Beker seisoen is?

Die Springbokke sit nou met 3 losskakels in Morné, Goosen en Jantjies, en so vêr ek kan sien, gaan een van hulle net tekkel-sakke dra vir 2 weke.

Daar blyk dieselfde probleem op heelagter te wees.  Waar ek geen twyfel het dat Jaco Taute groot spore on Springbok rugby gaan trap nie, kan ek net vir Tank Lanning aanhaal dat sy insluiting in die Bok groep niks minder gaan wees as ’n situasie waar hy met Lambie sal moet baklei wie die vier laaste minute van die wedstryd van die reserwebank sal opkom.

Dit is so dat Taute as veelsydige speler opgeroep is (’n rugby rugby-doodsvonnis in sigself) en dat hy wel in beide senter posisies, vleuel en heelagter vir die Leeus al uitgedraf het, maar die kanse dat hy Frans Steyn, die kaptein De Villiers, Hougaard of Habana sal lig is skraal – inteendeel, dit sal selfs krimineel wees as hy enige van daardie posisies van die bank af sal dek inplaas van spesialiste in daardie posisies.

Maar kyk, ten minste is hy daar en die groot plan met Meyer sal seker wees om hom aan die Springbok-kultuur bloot te stel (kan hulle nie net ’n video maak nie?).

Dit is wel goed om die kragman Coenie Oosthuizen terug te sien na ’n besering en dat daai rimpelkring Dean Greyling die trekpas gegee is, maar die insluiting van CJ van der Linde in die groep beteken dat ons vyf stutte het vir twee toetse het?  Ek weet nie of enigiemand vir my die logika daarin kan verduidelik nie?

Laastens wil ek net vra hoekom ek nog die naam van Jacques Potgieter in daardie groep moet lees?  Is daar ’n reël waarvan ek nie weet nie wat sê dat die Bok-span se gemiddelde IK nie ’n sekere syfer mag oorskry nie?

Vir al die name wat ek sien in die groep lyk dit nie of Meyer veel gaan torring aan sy beginspan nie, al wat ek wel weet, Meyer kan nie nog ’n verloor bekostig nie, veral nie op eie bodem nie.

Tags: Coenie Oosthuizen, Elton Jantjies, Hyeneke Meyer, Jaco Taute, Jacques Potgieter, Morné Steyn