Bokke is dom bestuur – Plumtree

John Plumtree, is steeds ontevrede dat hy nou eers van sy Springbokke vir die oorblywende wedstryde in die Curriebeker-reeks sal terugkry nadat sy rugbyspan ’n tuis-halfeindstryd Saterdag hier teen die Vrystaat verseker het.

Jóhann Thormählen, Volksblad

Al het dié Kiwi-breier van die Haaie hom nie openlik in die All Blacks se sege Saterdag in Soweto oor die Bokke verlekker nie, het hy ’n goeie hou na die Bok-bestuurspan ingekry.

Hy meen die nie-spelende Bokke moes vroeër al Curriebeker-rugby gespeel het, aangesien dit onnodige druk veroorsaak om hulle in die pylvak van die reeks te kies en dit dié spelers ’n onreg aandoen.

“Ons moet seker maak die besluit wat ons oor die Bokke neem, is tot voordeel van die span,” het Plumtree gesê.

“Daar is party Bokke wat baie gespeel het en ander nie juis nie. Die verskil is dat die Bokke wat nie gebruik is nie, gewoonlik teruggekom en vir ons deur die Curriebeker gespeel het. Vanjaar het dit nie so gewerk nie.

“Daarom moet ek spelers terugbring wat nie veel gespeel het nie. Ouens soos Lwazi Mvovo, Craig Burden en Pat Lambie.”

Plumtree meen dit plaas druk op hom om dié Bokke te kies.

“Dis die dom ding van om 30 spelers in die Bok-kamp te hou gedurende ’n toetsweek.

“Dit maak nie sin nie en sal moet verander, want om agt spelers uit Curriebeker-rugby te hou werk nie. Daar is geen logika daaraan nie en dit het nie in die verlede gebeur nie.

“Lwazi Mvovo en Craig Burden is ’n onreg aangedoen en ons gaan nou ’n kritieke tyd van die Curriebeker binne.”

Bokke wat egter ligpunte teen die Vrystaters was, is die vleuels Odwa Ndungane en JP Pietersen, wat van ’n duimbesering teruggekeer het.

Ndungane het twee drieë gedruk en Pietersen was weer pure Bok.

Plumtree was ook verheug oor sy jong spelers wat in die sege van 37-30 oor die Cheetahs gegroei het.

Plumtree het dikwels ’n stryd om sy Bokke terug te bring in ’n span wat goed vertoon, maar die Haaie se plek bo-aan die puntelys kan dalk help.

“Al wat Saterdag in Durban teen Griekwas op die spel is, is om van ’n moontlike tuiseindstryd seker te maak.”